Нешто што посебно ја збогати струшката туристичка понуда ова лето е секако кајакарскиот спуст по реката Црн Дрим организирана од спортско-рекреативното друштво Соларис. Спустот се состои во низводно веслање по целото течение на реката, од излезот на Струга до селото Глобочица во должина од 19,5 км поминувајќи низ несекојдневни диви предели покрај селата Враништа, Ложани, Добовјани и Ташмаруништа, опколени од планините Караорман и Јабланица. Она што е посебно впечатливо долж кајакарењето е богатата фауна со посебни единки кои во делот на реката што поминува низ градот исчезнале уште од време на мелиорацијата, па така при самото веслање ќе ги видите одамна заборавените видри, речни желки, чапји, корморани и различен жив свет автохтон на ова поднебје. Од друга страна, ќе ве плени убавината на неколкуте села распослани по бреговите на Дрим.
“Посебно задоволство приредуваат пејсажите околу Глобочичкото езеро. Самото сознание дека се весла над старото сега целосно потопеното село Глобочица дава една мистична убавина на целиот спуст. Идејата е да се промовира уште една природна атракција на струшкиот регион што дополнително ќе го етаблира градот во македонското туристичко семејство. Целиме кон пружање можност секој кој сака да ужива во оваа природна реткост да го направи тоа без никаква пречка, бил спортист или не. Затоа набавивме висококвалитетни кајаци и весла компатибилни на сите можни категории. А за безбедноста на кајакарите дополнително се грижи логистички тим на водачи и спасувачи, од вода и копно.” – вели Коста Хиохи, основач на спортско-рекреативното друштво Соларис. На нивната ФБ Страна Sportski Klub Solaris можете да најдете повеќе информации и фотографии за оваа прекрасна активност.
