И покрај сите емоции и мачни сцени низ целиот град кои се поради смрта на најголемиот фудбалер во клупската историја, легендарниот Диего Армандо Марадона, играчите на Наполи собраа сила и го добија со 2:0 дуелот од 4. коло во Лига Европа против хрватскиот преставник, Ријека.
И двајцата репрезентативци на Македонија, Елиф Елмас и Дарко Велковски беа стартери на дуелот на „Сан Паоло“, а „азурите“ дојдоа до планираните три бода со автоголот на Анастасио и погодокот на Лозано.
На само еден чекор од посакуваниот пласман во 1/16 финалната рунда се фудбалерите на актуелниот шампион на Хрватска, тимот на Динамо (З). Популарните „модри“ со 3:0 славеа на гостувањето во Австрија, а репрезентативецот на Македонија, Аријан Адеми беше асистент на вториот погодок.



