Ненад Димитријевиќ ги надмина проблемите со повредата на левото колено и се најде во составот на Хувентуд за дуелот од 5. коло од Еврокупот, во кој на домашен терен ја пречекаа Уникаха од Малага, а на крајот неочекувано го загубија со резултат 77:90.
Нашиот репрезентативен бек имаше лимитиран број на минути. Одигра нецели пет минути од првото полувреме, во кои реализираше четири поени. За кратко време, во два напади, ги погоди двата обиди вредни по два поени, додаде една асистенција, една освоена и три загубени топки.
Со овој пораз, тимот од Бадалона ја испушти првата меч-топка за пласмна во четвртфиналето. За да бидат таму ќе имаат тешка задача. Во шестото и последно коло, му гостуваат на францускито Нантер. Димитријевиќ и соиграчите ќе треба да ја одбранат предноста од пет поени со која ги победија французите на првиот меч во Бадалона.
