Македонскиот ракометен клуб Алкалоид обезбеди место во полуфиналето на Европскиот куп на ЕХФ, откако успешно го елиминираше Баја Маре. Во борбата за финале, тимот ќе ги одмери силите со норвешкиот состав Рунар.
Првиот натпревар е закажан за 20 април во 19 часот, кога „фармацевтите“ ќе го пречекаат ривалот од Норвешка во салата во скопска Автокоманда. Овој дуел ќе се одигра токму на големиот христијански празник Велигден, а македонскиот тим ќе се обиде да изгради значителна предност што би можела да му донесе историско европско финале. Реваншот ќе се одигра седум дена подоцна, на 27 април, на теренот на противникот со почеток во 17 часот.
Во второто полуфинале, тимот на Извидач од Босна и Херцеговина го очекува победникот од пресметката меѓу Партизан и АЕК Атина.




