Гридот на Формула 1, од наредната сезона ќе го има 18. јапонски пилот во историјата – Јуки Тсунода. Воедно, Тсунода ќе биде првиот Јапонец што настапувал во најбрзиот тркачки циклус после 2014, односно после Камуи Кобајаши.
Тсунода, со освоената трета позиција во Формула 2, се одликува со признанието ,,дебитант на годината” што дополнително го забрза прогресот на неговата кариера. Со своите дваесет години, Јапонецот ќе стане првиот пилот во Ф1 роден во 21. век.
,,Сфаќам дека, наредната година, ќе ја носам на рамена надежта на многу јапонски обожаватели на Формула 1 и ќе направам сè што можам за нив.” – се огласи Тсунода за Ф1.
Инаку, 20-годишниот тркачки талент потпиша договор со тимот на ,,Алфа Таури”, поранешен ,,Торо Росо”, заземајќи го местото на Данил Квјат. Во италијанскиот тим, негов клупски колега ќе биде Пјер Гасли.



