Во четвртокот, во знакот на денот на благодарноста, беа одиграни три натпревари на коишто славеа гостите. Тие натпревари се покажаа како одлична увертира за продолжението на неделата.
Од натпреварите што започнаа во 19:00 часот по средноевропско време, најмногу се издвојува дербито помеѓу Балтимор Равенс и Сан Франциско 49ерс. Равенс му направија одлична услуга на Грин Беј откако со 20-17 ги совладаа 49ерс. Победоносен беше шутот за три поени на Такер во последната секунда од натпреварот.
Одиграни беа и неколку дивизиски дуели. Најпрво, вреди да се напомене дека Тенеси Титанс на гостински терен ги совладаа Индијанаполис Колтс со 17-31. За разлика од нив, Питсбург Стилерс беа во неизвесност против Кливленд Браунс сè до самиот крај. Победоносното пресечено додавање беше дело на Хејден, а крајниот резултат изнесуваше 20-13. Неизвесен беше и дивизискиот дуел помеѓу Денвер Бронкос и Лос Анџелес Чарџерс. Квотербек за Бронкос беше дебитантот Дру Лок кој оствари победа од 23-20. Денвер стана првиот тим во историјата кој во една сезона ставил двајца дебитанти квотербекови и истите избориле победа. Освен Лок, другиот квотербек беше Брендон Ален во деветтото коло. Во дивизискиот дуел во НФК Запад, Лос Анџелес Рамс очекувано ја совладаа Аризона со 7-34.
Очекувани беа и победите на Грин Беј, Тампа Беј и Канзас Сити. Во снежниот Њу Јорк, Пекерс славеа со 13-31 над Њу Јорк Џајантс. Чифс буквално ги прегазија Рејдерс со 40-9, а Баканирс, откако имаа предност од 0-25 на полувремето над Џексонвил Јагуарс, на клупата го „оставија” Ник Фолс, а на негово место влезе Гарднер Миншу. Сепак ни дечкото со мустаќите не успеа да ги спаси „Јагуарите” од поразот што на крајот изнесуваше 11-28.
Ова коло не нè поштеди ни од изненадувања. До победа стигнаа Вашингтон Редскинс на гостувањето кај Каролина Пантерс со резултат од 21-29. Мајами Долфинс, изведувајќи неверојатни акции ги совладаа Филаделфија Иглс со 37-31, а до првата победа во оваа сезона стигна и тимот на Синсинати Бенгалс откако славеше доминантно над Њу Јорк Џетс со 22-6. Во доцниот вечерен термин се соочија Хјустон Тексанс и Њу Ингланд Патриотс, а Вотсон со 28-22 му го нанесе вториот пораз сезонава на Брејди.



