На 28 март 1919 година во Тетово е основан првиот и најстариот македонски фудбалски клуб – ФК Љуботен. Историјата на овој клуб започнува токму во 1919 година кога Франтишек Ваник, професор по физичко, донел топка и на своите часови почнал да практикува играње фудбал. Веднаш наишол на неколку ентузијасти меѓу кои биле Јован Марковски, Симо Момировски, Стевица Бошњаковски, Никола Павловски-Бутика и други. Тие биле првите личности кои ја дале идеата за формирање фудбалски клуб. Го избрале името „Љуботен” во чест на врвот Љуботен кој се наоѓа на Шар Планина.
Првиот натпревар на ФК Љуботен бил против екипата на ФК Спорт од Скопје, а натпреварот завршил со резултат од 1-1. Стрелецот на првиот гол во историјата на Љуботен бил рускиот емигрант Скуриков. Во 1965 година, ФК Љуботен за прв пат одиграл натпревари во странство (во Бугарија). Првиот натпревар бил одигран во Ќустендил против Левски и македонскиот претставник забележал пораз од 1-0. Веднаш потоа следувал уште еден пораз од Металург во Перник со 4-2. Единствен натпревар од оваа мини-турнеа кој завршил без пораз за ФК Љуботен, бил натпреварот против екипата на Поморие во кој двата тима ремизирале со по два постигнати погодоци. Најголемото достигнување на плавите е освојувањето на Втората македонска лига во сезоната 1992/1993 и настапот во Првата македонска лига во наредните 3 сезони.
Најжешки ривали на најстариот македонски клуб се нивните сограѓани Тетекс. ФК Љуботен моментално настапува во Третата македонска лига – Запад, а домашните натпревари ги игра на АМС Спортски Центар во Тетово.
Автор: Eпов Насе



