Струга на 8 ноември 2026 година ќе биде домаќин на првото издание на Меморијалниот пливачки митинг „Кире Ѓоргон 2026“, спортски настан посветен на ликот и делото на истакнатиот струшки пливач, тренер и спортски работник д-р Кире Ѓоргон.
Митингот ќе се одржи на пливачкиот базен во Струга, со почеток во 11:00 часот, а неговата цел е да се зачува споменот на Ѓоргон и да се продолжи традицијата на пливањето во градот.
Д-р Кире Ѓоргон, заедно со своите пријатели д-р Јосиф Докоски и Јонче Кувенџиески – Шишко, трагично го загубил животот, оставајќи зад себе спомени за нивната посветеност и љубов кон спортот.

Организацијата на меморијалниот митинг претставува можност преку спортот да се оддаде почит на луѓето кои оставиле белег во пливачката историја на Струга. Воедно, настанот има значење и за помладите генерации, кои преку пливањето ќе можат да ја запознаат и продолжат спортската традиција на градот.
Првото издание на „Кире Ѓоргон 2026“ се очекува да прерасне во настан што ќе го негува споменот на истакнатите спортски имиња и ќе придонесе за афирмација на пливањето во Струга.
Меморијален пливачки митинг „Кире Ѓоргон 2026“
📅 8 ноември 2026 година (недела)
🕚 11:00 часот
📍 Пливачки базен – Струга




