На наше огромно задоволство, ја информираме јавноста дека денес (09.07.2024) беше потпишан договор за соработка, помеѓу ФК Вардар и компанијата Новоматик Македонија, која и официјално стана нов генерален спонзор на клубот
Договорот е склучен на една година, а истиот беше потпишан од страна на претседателот на ФК Вардар Милорад Миленковски и директорот на Новоматик Македонија, Александар Симовиќ.Важно е да напоменеме дека компанијата нема да биде сопственик, туку исклучиво генерален спонзор, а сумата која што на годишно ниво ќе ја вложат во клубот, изнесува 1 000 000 евра.Групацијата NOVOMATIC е еден од најголемите меѓународни производители и оператори на технологии за игри на среќа и има повеќе од 25.330 вработени ширум светот.
Основана од професор Јохан Ф. Граф во 1980 година, Групацијата има повеќе од 2200 објекти за игри на среќа во околу 50 земји и извезува високотехнолошка опрема за електронски игри во повеќе од 120 земји. Во Македонија NOVOMATIC е присутен веќе 18 години со 2000 вработени. На домашниот пазар на игри на среќа компанијата дава значаен придонес во развојот на македонската економија и никогаш не отстапува од своето корпоративно мото – секогаш општествено одговорна компанија.
При денешното свечено потпишување кое се одржа во просториите на компанијата, свое излагање имаа претседателот на ФК Вардар, Милорад Миленковски, како и претставникот на компанијата Новоматик Македонија, Марија Митреска, кои ја потенцираа важноста на ваквиот договор, како и неопходноста од вложување во вистинските и искрени приказни, како што е токму нашата – за клубот на народот!




