Кристофер Џон Вајлдер познат како Крис Вајлдер е роден на 23. септември 1963 во малото гратче Стоксбриџ во близина на Шефилд во Јужен Јоркшир, Англија. Најпрво, кариерата ја започнал како играч на позицијата десен бек, а потоа станал тренер.
Играчка кариера:
Играчката кариера ја започнал во младинската школа на Саутемптон, но го напуштил клубот во 1986 за да премине во Шефилд Јунајтед – клубот за којшто навивал уште од детските денови. Во дресот на Шефилд Јунајтед настапил вкупно 93 пати во периодот од 1986 до 1992 притоа постигнувајќи еден гол. Од Шефилд бил пуштен на позајмица во Волсал, Чарлтон и Лејтон Ориент. Од 1992 до 1998 играл за Ротерам Јунајтед, Нотс Каунти и Бредфорд Сити, а потоа повторно се вратил во Шефилд. Од Шефилд бил пуштен на уште две позајмици, во Нортемптон и Линколн, а во 1999 се преселил во Брајтон. Кариерата како играч ја завршил во 2001 во Халифакс.
Тренерска кариера:
Тренерската кариера ја започнал во Алфретон Таун и со овој клуб освоил четири нисколигашки трофеи за само една сезона. На 2. јули 2002 повторно се вратил во Халифакс, но овој пат како тренер. На својата позиција останал сè до распаѓањето на тимот во 2008 односно над 300 натпревари.
После распаѓањето на Халифакс, Вајлдер бил асистент во Бери, но после шест месеци се преселил на клупата на Оксфорд Јунајтед. Во тој период, Оксфорд бил дел од петтата лига. Во втората сезона на Вајлдер како тренер на Оксфорд (прва целосна), преку плејофот успеал да го врати тимот во Лиг 2 и наредната сезона да му избори место во средината на табелата. Во наредните две сезони, Оксфорд под водство на Крис Вајлдер завршуваше како просечна екипа во четвртата лига на којашто ѝ недостигаа по неколку поени за влез во плејоф. Очекувањата на Оксфорд биле влез во третата лига, па Вајлдер незадоволен од својот учинок, си поднел оставка и се преселил во Нортемптон. Во првата полусезона како нивен тренер, го спасил тимот од релегација во петтата лига. Наредната година успеал да заврши во средината на табелата, а само една сезона подоцна го предводел Нортемптон до шампионската позиција во четвртата лига и промоција во еден ранг погоре.
Тренерски ангажман во Шефилд Јунајтед:
На 12. мај 2016, Вајлдер повторно се врати во Шефилд заменувајќи го Најџел Едкинс на тренерската позиција. Шефилд Јунајтед беше третолигаш кога го направи овој потег, а Вајлдер изненади кога за капитен го назначи Били Шарп – човекот со слична судбина како неговата и долговечен фан на истиот клуб. Оваа одлука беше дискутабилна бидејќи Шефилд беше прицврстен на дното од лигата после првите четири натпревари. Сепак, Вајлдер, знаејќи ги способностите на своите играчи, успеа да го консолидира тимот и да го однесе до врвот со освоени 100 поени – рекорден број на освоени поени во една сезона во историјата на Шефилд Јунајтед.
Во Чемпионшип, првата сезона беше исполнета со осцилации, но во вториот обид успеа да го промовира својот клуб во Премиер Лигата после 2007.
