Раководството на Кошаркарската федерација одржа неформална средба со спортските новинари и медиуми се со цел да се појаснат и да се презентираат досегашните активности на раководството како и идните планови поврзани со работењето во федерацијата.
Претседателот Перо Антиќ и неговите најблиски соработници имаа бурно лето пред себе од официјалното преземање на раководните позиции на КФСМ и претстоеше организација на две младински континентални првенства, Б и А дивизија, како и организација на камп во рамки на развоен проект насловен „Заедно до М16“, признат од ФИБА.
Тренерите кои ги предводат тимовите во домашните натпреварувања, за неколку дена ќе добијат прилика да слушаат предавања од реномирани тренерски имиња кои оставиле траг зад себе во својата досегашна кариера. Октај Махмути, Душан Ивковиќ и Ненад Труниќ ќе предаваат на задолжителниот тренерски семинар насловен „Лазар Лечиќ“.
Претседателот на КФСМ, Перо Антиќ, ги информира претставниците на медиумите околу селекторските позиции во сениорските репрезентации, а неговата изјава е следна: „Договорите на селекторите Јорданчо Давитков и Марјан Лазовски се завршени и истечени. Точно е дека сме веќе во преговори со тренери и за двете позиции, но сè уште ништо не е официјално. Летово Владимир Ѓоровиќ го прифати предизвикот да тренира заедно со женскиот сениорски тим, а понатаму ќе биде разговарано за официјално негово назначување на селекторската позиција. Во преговори сме со неколку тренери за селекторската позиција на машката репрезентација, кога ќе имаме нешто конкретно тоа сигурно транспарентно ќе биде претставено пред сите“.
Раководството на Кошаркарската федерација им даде до знаење на присутните дека федерацијата ќе продолжи да работи транспарентно, законски и со полна пареа, во правец на правилен развој на кошаркарскиот спорт.



