Поради конфликтот помеѓу Русија и Украина, од составот на Салават Јулаев Уфа заминаа тројцата Финци, а воедно и носители на играта – Сакари Манинен, Теему Хартикаинен и голманот Јуха Метсола.
Сепак, клубот од Уфа успеа да се справи со ситуацијата и да се пласира во четвртфиналето со победата над Сибир Новосибирск од вкупни 4-1.
Во петтиот меѓусебен меч, Салават триумфираше со 3-2 и влезе во втората фаза од плејофот по петти пат во низа.
Заклучно со првите дваесет секунди од третата третина, домаќините стекнаа водство од 3-0 преку Алексеј Пустозјоров, Глеб Кузмин и Николај Кулемин.
До крајот, гостите од Новосибирск успеаја само да го намалат својот заостаток и да се опростат од сезоната со головите на Александер Шаров и на Јегор Аланов.
Во наредната рунда, Салават ќе ги одмери силите со Трактор Чељабинск, кој го елиминира Нефтехимик Нижнекамск со 4-0.
