Изминатите неколку денови беа резервирани за „Бритиш Мастерс“ – турнир во голф што спаѓа во Еуропеан Тур. Овој пат, турнирот се одржуваше на „Клоус Хаус Голф Клуб“ во Нортумберланд по волја на Ли Вествуд. Од 2015 наваму, „Бритиш мастерс“ се организира на локацијата што ја одредува најдобро пласираниот британски голфер во моментот кога треба да се донесе одлуката.
На последното издание, до победата дојде Италијанецот Ренато Параторе кој ја оствари својата втора победа во професионалната кариера. Првата победа на Параторе датира од 4 јуни 2017 кога беше најдобар на „Нордеа Мастерс“ во Шведска.
Италијанскиот голфер доминираше во текот на вториот, третиот и четвртиот ден и заслужено дојде до овој триумф. Единствено, после првиот ден се наоѓаше на втората позиција, веднаш зад тогашниот првопласиран голфер Дејвид Лоу.
Параторе со вкупни (-18), зад себе ги остави Расмус Хојгаард (-15) и Џастин Хардинг (-14), а четвртото место со (-13) го поделија три англиски голфери – Роберт Рок, Едни Саливен и Дејл Вајтнел.
